Guayaquil

Das Weekend hani scho mal chli vom Land gseh:) Mir sind mit em Auto vo Cuenca nach Guayaquil gfahre. Die Stadt isch di 2. gröscht vo Ecuador – nach Quito. Si befindet sich ade Küste und Cuenca ja ide Sierra, das heisst ide Ande. Deshalb hämer müesse über riesigi Berge fahre. Da hät mer en wunderschöni Ussicht gha. Aber ich ha mich ned immer chöne uf die konzentriere, will die da soo schlimm Auto fahrid und ich mich immer am hebe gsi bi^^ Mer sind mini Gastmum, ihre Fründ de Gustavo, dem sini Tochter und dere ihre Fründ zäme gfahre. D’Fahrt duret chli meh wie 3h, aber da mir immer aghalte händ um Fötelis z’mache und z’ässe, häts bi uns chli länger duret. Wie gseit han ich so scho chli vo de Landschaft gseh. Z. B. häts bi uns scho au grüeni Strücher, aber zwüschedure au so Trocheplfanze wie Kaktus und so. Uf de andere Site vo de Ande hingäge isches uh grüen. Si tüend ded au Ris apflanze oder es git Bananebäum und Kakaobäum. Überall ade Strass häts chlini Hüttene und defor händs Ständ überlade vo Frücht, z’Trinke und na vielem meh. Einisch hani sogar gseh, wie si es ganzes Schwein ufem Stab überem Füür grilliert händ. D’Tochter vom Gustavo hät gmeint ich mües unbedingt mal d’Hut vom Schwein probiere, aber ich bi dä ned so begeischteret gsi da ich ja allgemein Fleisch ned soo gern ha:)

In Quayaquil acho simer zu de Familie, bi dene mir händ chöne penne. Das sind gnau so Bonze gsi wie mini Familie. Nacher simer chli id Stadt gange. Ded hämer en Leguanepark bsuecht und d’Chile vo Guayaquil agluegt. Nacher simer chli am Fluss entlang spaziert (isch fasch so wie ide Summerferie wämer uf dene Wegli am Strand entlang spaziert). Ded häts au uuh viel Parks mit mega schöne Blueme wo ich na nie gseh ha:) Dän simer ines chinesisches Restaurant:P ga ässe. Nacher simer wider zum Hus vo dere Familie gange und ded häts dä natürli Frücht und Saft gä. Nacher simer mal entlich ga penne. Aber um 3 ide Nacht sind d’Tochter vom Gustavo und ihre Fründ uf de Flughafe will si nach Miami sind. Deshalb isch das chli en umständlichi Nacht worde und am Sunntig am Morge hämer dä gar ned so recht möge umelaufe. Minere Gastmum isches dä au ned so guet gange und dä hät si gseit, si well na gschwind was ga ichaufe und nacher chöngid mer ja heiga. Dä simer i sonen Lade wo öpe glich isch wie d’Ikea und ded hät si eifach so rasch für 800 Stutz ikauft!!! Si hätti gar nüt brucht, aber si hät gfunde si täg gern shoppe!! Naja – Bonze halt^^ Dän hämer uns uf de Heiweg gmacht. Unterwegs hämer dä au mal bi some Stand ade Strass aghalte und händ zermalmti Kokosnuss mit Iswürfel trunke. Isch na recht fein gsi:) Ja nacher hämer nomal aghalte zum Esse und dä isches richtig Ande gange. Bi uns isch alles recht hügelig, will mir ja ide Sierra sind. Aber in Guayaquil isches praktisch flach gsi. Und womer dä so richtig Ande gfahre sind, händ so riesigi Berge vor eim ufgragt, so wie en mächtige Schatte:) Und dän simer dihei achoo^^ hehe und dä hät si en heissi Schoggi gmacht mit dere Schoggi wo ich us de Schwiz mitbracht ha (si sind recht begeisteret defo^^ si finded, d’Schoggi vergieng eim uf de Zunge^^).