weekend:)

Das weekend isch ned so viel los gsi, da ich ned würkli gross usedörfe ha^^ am fritig isch so es konzert band isch und unser colegio au teil gna hät, hani au dörfe ga:) ja isch denn na recht gechillt gsi:) am samschtig hani mi denn mit de kelly troffe zum ga zuetate ikaufe, denn am sunntig hämer zäme für unseri familie was us estland und was us de schwiz kochet. Aso ja hehe eigentli hämer mal vorgha en suppe mit gmües z’mache und als hauptgricht pouletgschnetzlets mit ananas sauce und herdöpfelstock. Und als dessert schoggimousse und so en cake us estland. Aber das am samschtig sooo übelst gschiffet hät, wie ichs na niiie gseh ha!! Aso würkli, riiiiesigi rägetropfe und meeega viel uf s’mal!!! D’strasse da sind so schachbrettartig agordnet. Phuu und die wo senkrecht obeanabe sind, ded isch öpe 15cm wasser gsi, also würkli wie en chline fluss!!! Ja und deshalb hämer denn ned alles chöne kaufe und händ beschlosse am sunntig am morge alles zmache und deshalb häts ned glanget für schoggimousse. Au hämer ned gnueg zit gha zum herdöpfelstock zmache^^ hehe deshalb häts denn eifach brötleti herdöpfel gä und zum dessert crêpes mit glace und schoggisauce. Ich han denn eifach gseit, das sig us de schwiz^^ ah ja und das hämer zum hauptgrund deshalb gmacht, will mini gastmueter geburi gha hät:) am abe hät denn mini gastschwö und ihri kollegin kochet. Ja und isch na recht easy gsi das mini gastmum mit de eltere vo de kelly gred hät, denn die händ das ganze mit em brief und em zischtig recht locker gna..:D so isch mini gastmueter au chli beruhigter… aber mir tuets natürli immerna total leid, dass ich si agloge ha… ja und was lauft so ir schwiz?^^

allgemein

Ja und weni ez scoh mal glägeheit han, öpis is internet z’schriebe, denn schriebe da au mal grad chli allgemein über gualaceo und na chli über mini familie:) chönt halt si, dass ich mich widerhole, da ich ned cha nacheläse was ich scho ufem blog ha…
Gualaceo isch wahrschinli chli chliner weder bremgarte. Die mitti häts en park mit me brunne und blueme und alles, voll schön:) ded treffid sich eigentli immer di junge, denn rund um de park häts glacestand und sunschtigi tiendas. Unde am park isch en mega schöni kirche (aso ich hasse kirche immer na, aber si isch würkli schön^^). Und näb de kirche isch na en andere markt, ded werdid frücht und gmües und sunschtigs züg verkauft. Denn häts namal en andere markt und ded wird tag und nacht kochet. Dasch ded wo cuy brötlet wird und säuli. Au machids ded di beschte tortillas wo ich da je gässe han^^ und pommes frites machids da au^^ z’wetter da isch recht easy. In cuenca isches kälter und in letschter zit schiffets jede namittag wie us küble in cuenca. Mir hingäge händ eher wenig rede. Aso im september häts anschienend de ganz monet ned gregnet. Ez tuets zwüsche dure mal so, aber ned würkli viel. Phui und wenn d’sunne schiint, denn brennts üübelst!! Was halt chli nachteil da isch, isch dass ime dorf immer alli alles wüssid. Es hät da so en alti schachtle wo ir gliche strass wohnt wie mir und immer wenn si mich dusse gseht denn seit si scho wider uf de strass oder es isch zit zum heigah oder ständig settigs züg:P aso ja das seit si zu allne, mini gastschwö hät mir au scho verzellt, was die alt alles für züg useglah hät^^ ah ja und natürli häts na en fluss da:) wo mer au cha ga bade^^ und wunderschöni berge rundume… mit minere schwö verstahni mi au mega guet. Aso si isch chlii kindisch für das, dass si scho 17ni isch. Aber tuusig mal besser weder en 8jährigi gastschwö^^ am abe vorem is bett gha verzellt si mir immer alles vo ihrne liebessorge^^ min gastbrüeder isch recht schüch und gaht ned so viel use, aber wenn er mal afangt rede, denn hört er nüme uf^^

adressi

Ja und da isch na entli mal mini neu adrässi^^ aso ja es isch ned würkli en adrässi. Mer cha da briefe und päckli ned bis nach hei schicke. Falls jemand en karte oder was au immer schicke möcht, denn müend ihr uf de poscht nach enere agentur wo bis na gualaceo gaht. Mini mum hät gseit z. b. jimmy express. Und denn müend ihr eifach uf karte Ecuador Azuay Gualaceo schriebe und mir melde, dass ihr was gschickt händ und denn mues ich da in guala uf d’agentur zums ga abhole..:)

probation letter

Phuu okey aso ez chunt denn halt alles uf s’mal is internet… aber ja gaht halt ned andersch… de zischtig isch grad chli min pechstag gsi…aso wegem familiewechsel han ich ja es warning. Und wenn mer 2 warnings hät, denn wird mer heigschickt… ich han scho recht respekt gha vor dem warning. Z.b. hät mini gastschwö mich grfaget ob ich down hill mache will und denn hani gseit ja chli später im jahr denn. Will ez isch da na z’frisch mit warning und so. ja und denn seit kelly so ja mir chöntid doch am zischtig schuel schwänze und uns en easy tag in cuenca mache. Das hät denn recht verlockend tönt und ja deshalb händ mir denn unsere familie und de schuel gseit, mir heigid es meeting mit yfu in cuenca. Ja und denn simer am zischtig morge mit em bus uf cuenca und zersch bi minere exfamilie verbi will ich mini camera em husmeitli usglehnt gha han und denn simer is zentrum chli ga shoppe und glace ässe^^ am namittag hämer uns denn mit em pablo und em alfonso troffe. Mit ihne simmer denn is Monday blue ga en kafi trinke. Ja ded hämer denn en typ us frankrich us toulouse (bi ned sicher ob mer das so schriebt, verlier da mis franz nämli scho na recht..:() de isch na mit zwei andere type us quito ded gsi. Ja denn hämer recht es intressants gspräch gha, denn de schaffet für so en politischi organisation:) später simer denn is habbibi ga shisha rauche und ded hämer na d’agnes und 2 anderi ustuschschüelerinne atroffe wo ich na vom alborada her kenne. Ja denn simer ded so voll di gross gruppe gsi und händs mega cool gha:) mir händ denn planet, dass di andere mal uf gualaceo cho müend und alles. Ja und am namittag hät mir mini gastschwö einisch gschriebe gha, dass d’ruth aglüte heig. Denn heig mini gastmueter natürli gseit ah bettina isch ja grad bi ihne. Und d’ruth so nei, si heiged gar keis meeting, si täg grad alüte will eis am fritig sig. Hehe ja und denn hät kelly gseit, ja schrieb ihre eifach, dass mir uns mit de volunteers troffe händ und d’ruth nüt defo gwüsst hät. Denn han ich ihre das gschriebe ja und nüt meh. Am abe simer denn zum terminal in cuenca zum wider zrug nach gualaceo ga. Im bus ine lütet mir denn d’ximena ah (chefin in quito). Und ich bin so paff gsi und ha gar nüt überleit und eifach abgnah. Si denn so ja wo ich sig und werum ich ned id schuel sig und mini familie agloge heig und a was für me meeting ich bitte gsi sig. Ich han denn ihre welle s’gliche wäge wie de diana und ha agfange säge ja mit de volunteers… aber denn hani denkt weni die ez au na alüge, denn chunts nu na schlimmer. Deshalb hani ned anders chöne, als eifach ufhenke. Denn ich ha zersch welle mit minere familie alles is klare bringe… d’rückfahrt isch denn zunere horrorfahrt worde will mir ned hei händ welle und säge, dass mer si agloge händ. Und ja da ich scho es warning ha und weiss, dass schuelschwänze geg d’regle verstosst, han ich mich au gfragt, was das für konsequenze hät… ja diheime acho han ich zersch nu mit minere gastschwö gred und denn na mit minere gastmueter. Ich han ihne di ganz wohret verzellt und bi mir soo schlecht vorcho, will ich si agloge han… denn ich han si würkli alli meeega fescht gern!! Ja mir händ weiss ned wie viel stunde gred, bis denn all mal ga schlafe sind. Aber ich ha natürli kei schlaf gfunde gha… na im bus han ich am pablo aglüte zum frage wasi mache sell, denn am alfonso und na de flavia… wo denn so all ga penne sind bin ich uf s’dach ghöcklet und denn hät mir de pablo aglüte zum frage wie s’gspräch verlaufe sig. Ich han ihm denn alles verzellt und mir händ na öpe en stund lang zäme gred:) denn bini vor erschöpfig und kummer au langsam müed worde und ga penne. Am nächste morge denn, bini ine telifoncabine zum de ximena alüte. Ich weiss ned ob si grad en guete tag gha hät, aber si hät das ganze recht easy gna. Ich han ihre di ganz gschicht verzellt vo a bis z und mit de ganze wohret und si hät mich keis einzigs mal untrbroche, au wenn ich mal kurz ha müesse überlege wie mer es wort in spanisch seit… si hät denn eifach gseit, dass ich ez en nächste brief heig nämli en prabation. Und weni ez na ein chline shit mache, denn wirdi heigschickt:( ja und denn hani na am mami und am papi aglüte zum das verzelle^^:) und denn hani na de ruth müesse alüte, zum mich entschuldige. Hehe aber si hasst mich:D denn hani so aglüte und gfragt ob si i dem moment spreche möchte oder lieber am fritig bim meeting. Si hät denn gseit ja ich möcht dir nur eis säge, ich kenn din charakter und ich weiss wie du ticksch. Deshalb han ich dich au ned nach gualaceo welle ga lah. Ich han gnau gwüsst, dass du en schlächte ifluss uf kelly ha wirsch!! Si hät bis ez alles perfekt gmeischteret und ich warn dich, das isch s’letschte mal dass kelly schlecht beiflusst häsch!! Ich wird ez es bsunders augemerk uf dich ha und ein chline scheiss und du gasch hei! Naja wenn si meint si kenni mich so guet…:P ämel hani ez en chlini yfu briefe sammlig^^ ich mein ich finds ja eigetnli ned luschtig, es isch eifach ziemlichi ironie, dass ich wo ja würkli verantwortlich bi und au ir schwiz d’scuhel und alles ernst gna ha, da ez so problem ha. Und vor allem bin ich da na di heiligst… di andere chömid amig am morge am 5i bsoffe hei und schwänzid ständig d’schuel… aber ja… d’hauptsach isch, dass mini familie mich glich na gern hät und mir uns usgsproche händ:) hehe s’einzig wo mi chli ahschiesst, isch dass ez d’regle chli strenger werdid^^ aber ich verstahs ja und bin schliesslich au selber gschuld… ich daf ez halt nüm so viel use händs gseit.

wuchenendi

Ja ich schrieb ez eifach immer, wenn ich was erlebt han und tue denn halt alles mitenand in blog… Das Wuchenändi isch mega cool gsi:) Am Samschtig Namitag simer chli im Park umeghängt und an Fluss ghocket. Am Abe isch denn en Hochzit gsi. Da mues mer so voll di formale Kleider alege für anes Hochzit. Hehe und ja theoretisch set mer au ned uniglade ga, aber dasch de näbesächlich gsi^^ denn hämer di ganz Nacht mit Stöggeliscuheh tanzet… Phu nacher hani mer eifach d’Stöggelischueh uszoge und bi barfuess heigloffe^^ Mir hättid eigetnli so am 2 müesse diheime si, aber da mir all zäme hei sind und Kelly und de Pablo ersch später heiwelle händ, simer denn am viertel vor 4i diheime gsi^^ aber zum Glück hät unseri Gastmueter nüt gmerkt gha:P Ja und hüt hani d’Wösch gmacht, denn mir händ da kei Wöschmaschine und müend drum d’Kleider immer selber wäsche… Am Namittag hät denn de Kelly ihre Vater si, ihri Mueter, mich und mini Mueter id Berge gfahre und denn simer ga spaziere. Wuah eifach puuri Natur und riesigi Ussicht!! S’gröscht!! Obe acho simer hereghocket und händ Mango gässe und eifach d’Magie vo dere Atmosphäre wirke lah… Denn isch uns de Oktavio (Kelly ihre Vater) wider ga hole und hät uns abegfahre. Hehe und er hät uns sini Meerschweinli uns Säu und alles waner sunsch na hät zeigt:) Voll s’coole Weekend gsii:)

ersti nachricht us gualaceo^^

Uiii ez chumi au wider mal dezue was z’schriebe… es isch ebe eso, dass mini Familie da kei Internet im Hus hät und ich deshalb immer ines Internetcafi muen zum was schriebe. Und da ich da ned immer igsperrt bi und am Namittag usecha, chumi ned so viel dezue is Internet z’ga… Aber es hät da die Mitti vom Dorf en Park und ded häts Internet. Deshalb han ich mir ez mal Zit gna, zum da i mim Zimmer was z’schriebe und später gangi denn in Park, damit ich de Bricht und es paar mails nu na abschicke cha:) Ja aso eigetnli weisi gar ned was schriebe, denn ich bin da eifach üüberglücklich:) es isch scho de 8. November!!! Und es chunt mer üüüberhaupt ned so vor!! S’Wetter isch da halt immer glich hehe und da in Gualaceo isches wärmer denn in Cuenca^^ Zwüschedure isches chli neblig, aber meischtens Sunneschii:) Hmm.. ja und ich gang da uf en Nonneschuel^^ aber isch voll gechillt, Kelly und ich händ eifach gseit, mer heiged kei Religion und deshalb müend mir bi de Gebet und so ned mitmache. Denn das isch glich wie im Alborada: jede Morge wird inere Reihe higstande, denn seit jede Tag en andere Curso es Gebet, denn spielt eine vo de Lehrer es Lied uf de Gitarre und denn gömer id Stund. Ich han da Stunde wie Physik, Mathe, Bio, Chemie, Religion, Computer… Hehe und da Kelly am Afang praktisch kei Spanisch hät chöne und mir vo YFU us erst ab Januar Note bruchid, hät si eifach allne Lehrer gseit, mir müessid kei Ufzgi mache und kei Prüefige schriebe bis im Januar^^ Ja und mir händ da au am 2 us und denn gömer amig hei ga zMittag ässe und so um di halbi 4i triffi mi amig mit de Kelly im Park. Hehe mir händ uns scho zur Rutine gmacht, jedes mal es Glace ga ässe und jedes mal chumi mer so richtig wie die Ferie vor:D Denn hängid mers amig im Park und irgendwer triffid mer immer ah… Denn da sind die i unserem Alter scho ade Uni und händ deshalb ganz verschiedeni Zite wo si Klasse händ.
Ja und zur Familie… Wie scho gseit ich han en 19jährige Gastbrüeder, aber de isch uh ruhig und praktisch immer diheime am penne oder Gitarrespiele^^ Mini Gastschwö isch 17ni und mir schlafid im gliche Zimmer und sind ir gliche Klass. Ich verstah mich voll guet mit ihre:) am Abig vorem ischlafe verzellt si mer immer, was si ufem Herzli het vo wäge Kolleginne oder verliebtsii^^ D’Mueter isch au uh mega lieb:) De Vater lebt wie gseit ide USA… Letschti hät er mal aglüte und denn hät mini Gastschwö d’Diana abgnah und mit ihm gred und nacher chunt si so, ja ob ich au mit ihm wel rede. Und denn hani denkt ja werum ned^^ Und er isch sooo herzig gsi:) er hät so gseit, ja dass er sich defür entschuldigt, dass d’Familie so arm sig und s’Hus nani fertig baut sig… Und ich ha gseit es sig üüüberhaupt keis Problem!! Denn ich hassi d’Istellig vo de Riche und sig viiiel lieber bi Arme, wo was si a Geld ned händ, defür a Liebi händ… Ja wie ich da grad agsproche han, sind si schona recht arm…S’Hus hät ide Mitti eifach es Loch und Stäge wo ufefüehrid und denn landet mer ufem Dach. Aber ja dasch ned so schlimm, da’s da praktisch immer warm isch.
Hm… was meh… weiss gar ned wasi alles na so chönt verzelle^^ Ah ja letscht Weekend sind Fiestas de Cuenca gsi. Denn simer uf Cuenca ga fäschte. E Party mit elektronischer Musig vom Abe am 5i bis am Morge am 5i^^ isch na recht amüsant gsi und natürlich händ mal wider all zimli gnueg trunke gha…:P
Ja ich denk, dass ich ez amig nüm soo viel in Blog schriebe wird, da ich ez nüm ständig in Hus umehocke muen und ned weiss was mache… Ez chani würkli mit de Ecuadorianer zäme sii und natürli am meischte mit de Kelly:)