Familiewechsel

Ja entlich hät sich das ez chli konkretisiert... Ich bi geschter mit dere YFU Representative, de Ruth, ga rede. Si hät mir denn gseit, dass ich daf nach Gualaceo wechsle:) Ich gang ez hüt ga z'Velo abhole bi minere Schuel und denn chani viellicht hüt Namittag oder morn am Morge uf Gualaceo:) Ich freu mich scho mega zu dere Familie z'ga:) Ich chan ez halt ersch es paar Sache vo ihne verzelle und in nächster Zit wirdi wahrschinli au ned an PC cho... Aber sobald ich denn Zit ha, verzelli wie ich mich ded so igläbt han:) Denn ich mues au Schuel wechsle, da Gualaceo öpe en halb Stund vo Cuenca entfernt isch. Ja und na zu de Familie. Die hend en Tochter wo 17ni isch und Diana heisst und en Sohn wo 19ni isch. De Vater wohnt ide USA, da er ded schaffet... D'Diana hät mir verzellt, dass si ihre Papi sit si 3 isch nüm gseh hät... Denn händs na zwei Hünd und de eint devo hät 6 Jungi:) Die sind soo herzig^^ so richtig chlini Wullechnäuel:) Und na en jungi Katz:) S'einzig was bi ihne viellicht als negativ Punkt cha agluegt werde, isch dass ich s'Zimmer mit minere Gastschwö teile muen. Aber so schlimm isch da au ned:) Ja und ich wird ded uf en katholischi Schuel ga... Aber dasch scho easy, denn die händ ded so Fächer wie Biologie, Chemie, Gschicht und so... Aso mal chli intressanter weder da im Alborada...

Oriente Föteli 5

Das isch es Föteli vom Platz vorem Hotel. So chli links vore chunt mer ufe und denn lauft mer am Pool entlang und rechts hinde isch denn d'Reception und denn na meh nach hinde gahts zu de Zimmer.

Alles isch us Holz hergstellt und gseht echt super toll us:)

Ja dasch quasi unseri Terrasse vo unserem Zimmer. Mit Hängematte natürli^^ und hinedra gseht mer na wie mir unseri Kleider ufghenkt händ, denn die sind amig chli nass gsi wenn mer im Fluss gsi sind^^

Dasch da wo unseri Füehrer na mit me chline Bueb zäme Musig gmacht hend. Mit de typisch Kleider natürli^^ Dasch so chli de Abschluss gsi...:)

Oriente Föteli 4

Ja dasch ebe i dem Papillorama:)

Das au^^

Dasch na im Amazonia.. hehe de Vogel hät grad en rundi posed^^ aber gseht voll luschtig us:D

Dasch au namal so en Vogel:) Hät mega viel verschiednigi Tier gha und au mega farbigi Vögel.. Aber ich ha da halt ned so Platz zum alles alles druftue... aber die wos intressiert, die chönd denn mal verbicho weni wider ide Schwiz bi, denn machi nämli es Album:) Oder genau Diashow chönt mer denn au mache^^

Oriente Föteli 3

Dasch wo mer i dem Amazonia parc gsi sind. Hehe das sind grad 2 Affe^^

Dasch wo mer zrug is Dorf sind, da hät uns ebe die Frau erklärt und zeigt wie Töpferei da funktioniert:)

Das isch de Carlos mit dere Röhre ide Hand, mit dene si ded jaged:)

Da hämer ebe us dere Schale Chicha trunke. I dere chlinere Schale isch Chicha mit me recht höche Alkhoholghalt gsi... Ja hehe und wie mer gseht han ich mich au amale lah^^

Das sind d'Zuetate für zum s'Getränk gnennt Chicha zuezbereite^^

Ja dasch de Kochherd i some typische Hus. Obe am Kochhert hets so en Korb und ded tüends z. B. Fleisch oder Fisch dri zum räuchere, damits länger haltbar isch. S'Für brennt ca. 20h am Tag, das heisst praktisch immer...

Hehe ja das sind zwei us Finnland und ich ha denkt, die muesi Fötele denn es gseht andersch geil us mit de blonde Haar und dere rote Farb...^^ Die Farb wird us chline Kerne i dere kastanieähnliche Frucht hergstellt.

Tuet mer echt leid für d'Reihefolg... Das wär nomal es Föteli usem Urwald. Hehe da hämer en Spinne zmitzt ufem Weg atroffe^^ und all händ Horror defor gha unter em Spinenetz durezlaufe^^

Oriente Föteli 2

Ja dasch da womer uf de Knüppel gsesse sind wo ame Seil agmacht isch und denn so eifach in Urwald use gschwunge sind:) Ah dasch meeega cool gsiii:)

Das isch ebe de Kreis wo unsere Füehrer mit de dünne Liane bildet hät und sich denn um d'Füess tah hät und ufekletteret isch^^ De Typ womer da grad na ufem Foti gseht isch de, wos denn au na versuecht hät.. aber kläglich gscheiteret isch^^ hehe nei aber es isch bestimmt au mega schwierig...

Das isch d'Reina de la selva vo unserer Gruppe gsi^^ hehe mir gfalled die gfakte Lippe so guet:P

Ja und dasch ebe de Baum mit dene meeega dicke Wurzle womer cha drahaue wenn mer sich verirrt hät..:)

Ja und das hät er uns ned erklärt, aber ja es hät au soo viel spezielli und schöni Sache gha, dass mer nie witercho wärid, wenn er alles erklärt hätti... das hät mir eifach na recht gfalle und drum hani denkt ich tues au mal in Blog^^

Oriente Föteli 1

Ja das wär ebe de Wanderbaum^^ Dem wachsid Wurzle zum Baum us und so bewegt er sich fort^^

Das isch unser Hotel "la casa del suizo". Isch scho na recht geil gmacht:)

Das isch das Dorf, zu dem au unser Hotel ghört. Wie gseit isches ei Strass und es paar Hüser dranah^^

Dasch gsi nachdem mer zum Car usgstiege sind und zum erst mal uf die Bötli sind mit de Schwimmweschte.

Das isch na ufem Weg vo Cuenca nach Quito. Ich ha denkt ich mach da mal na chli Föteli vo de Landschaft. Aber isch halt ned so guet gange, da d'Schiebe derfor gsi isch^^ Übrigens na sorry für d'Reihefolg, aber irgendwie häts bim ufelade ned so funktioniert^^

Oriente

Wuuuuah!! Aso erstmal muesi saege, dass all wo irgendwie d'Glegeheit hend, mal in Urwald z'gah, das uuuunbedingt nuetze sellid!! Dasch eifach so was vo en anderi Welt... Und wasi au na grad mues loswerde isch, dass ich da ned mit ae oder so schriebe cha wil ich grad ime Internetcafi haenge. Das allei waer na nuet speziells, aber ich bi ez ebe grad vom Urwald zrugcho und mini Gastmum isch ned dihei. Denn hani ihre uf s'Natel agluete und si haet gfunde si sig im Kino, si chiem denn so i 2h hei.. und eigentli wuer ich ez gern ga dusche und Taeschene uspacke, aber ja hehe defuer chani ez vom Urwald verzelle^^ ich ha extra Tagebuech gschriebe im Urwald, dasi au jaaa nix vergesse.. aber dasch ez natuerli ide Taesche, drum fallsi was vergisse, schriebis denn halt eifach spaeter na ine..:)
Ja also eigentli hend mir 4 wo in Cuenca wohnid scho am Maentig Abig welle ga, denn mit em Bus vo Cuenca uf Quito duureds oepe 10h. Ide Nacht isches chli schneller, wil de Bus ned oft ahalted. Aber d'Chefin vo YFU, d'Ximena, hets uns ned erlaubt.. Deshalb simer am Zischtig am Morge uf de 9ni Bus. Ja mit chli Landschaft aluege und Musig lose und schnure isch Zit denn irgendwie verbi.. Aber am Schluss simer denn scho chli ungeduldig worde.. Da mir denn gnau am Abig in Quito acho sind, hets au na recht viel Stau gha und deshalb simer na spaeter acho. Im Terminal acho hemer denn es Taxi gsuecht, um zum Hotel z'fahre. Ded acho simer ga esse und hend natuerli all Ustuschschueler mitenand gred und di neuschte News ustuscht... Spaeter sind die vo unserem Zimmer denn ga schlafe, wil mer recht mued gsi sind. Die andere sind denn na id Disco und eini haet sich denn sogar muesse ga uebergae... Am naechste Morge simer denn am 6i ga zMorge esse und denn mit em Bus zu unserem Hotel im Oriente, wo "la casa del suizo" gheisse haet. Je naecher mir am Oriente cho sind, desto heisser und fuechter isches worde.. Mir sind ungefaehr 6h gfahre und denn simer bi me Fluss, am Rio Napo acho. Ded hemer unser Gepaeck uf so chlini Boetli packt und mir selber haend en Schutzweste agleit und sind au uf Boetli ghocket. Denn simer oepe 10 minute gfahre und uf di ander Site vom Fluss. Ded simer denn an Land und mit unserem Gepaeck ad Reception und denn s'Zueg id Zimmer ta. Denn simer ga zMittag esse und es haet es riiiiiese Buffet gae!! Suppe, Salat, Hauptgang und Dessert!! De Namitag hemer denn fuer uns gha. D'Rahel (au Schwizeri) und ich sind chli is Dorf (wo us enere Strass mit es paar Hueser denaebed bestaht^^) ga spaziere und di andere sind in Pool. Am Abe bin ich denn wider frueh ga penne, wil ich immerna recht mued gsi bi... Und ich ha natuerli au welle fit si damit ich de naechst Tag im Dschungel ha choenne gniesse!! Am Morge haets denn am halbi 8i zMorge gae, und wider so es riiiese Buffet!! Ruehrei, Chaes, Schinke, Broetli, Ruehrei, Kochbanane, fritierti Yuca, natuerli meega viel Fruecht, Fruchtsaft und na viiieles meh!! Nachem Zmorge hemer uns alli muesse Gummistiefel schnappe und denn simer wieder mit dene Boetli chli ufem Fluss gfahre und denn anere Stell agleit. Vo ded us hemer uns in 3 Gruppe ufteilt und jedi het en Fuehrer zueteilt becho. Die 3 Fuehrer sind denn au fuer beid Taeg fuer uns zuestaendig gsi. Ja denn haend mir so agfange, dass mir ime chline Fluss in Dschungel inegloffe sind. Zersch haet uns de Fuehrer erklaert, dass mer uns ned eifach dafid neumet abstuetze, sondern immer muend luege obs ded kei Viecher haet... Ja und unterwegs haet er uns denn z. B. Stei zeigt, mit dene di Iheimische Farb herstellet fuer z. B. bi Toepferei Muschter uf s'Gschirr z'zeichne. Denn het er uns ded au na grad s'Material zeigt, mit dem Keramik hergstellt wird. Denn simer vom Fluss eweg und uf trochnem Land dur de Dschungel. Ded haet unser Fuehrer denn so en gelbi Spinne gna und zeigt. Ja und wenn mer sich chli gachtet het, het mer staendig irgendwelchi Viecher gseh..:) und es isch au alles sooo strub gruen gsi!! und Groesseverhaeltnis sind au viel andersch.. Aso scho allei z. B. s'Farn isch andersch viel groesser weder bi uns! Und fuecht isches natuerli au gsi... mir sind nu chli gspaziert, aber de Schweiss isch uns nu so abegloffe..! Hehe und denn haet uns de Fuehrer so en Baum zeigt, de haet Wurzle im Bode und denn wachst er und nacher wachsid aber au Wurzle vom Baum in Bode abe. Und jenachdem uf wellere Site dases abewachst, ded hi bewegt sich de Baum. Deshalb nennt sich de uf Spanisch irgendwie Wanderbaum glaubs^^ Denn haets na en Baum gha, dem sis Harz isch roetlich und das nennt sich uf Spanisch "sangre de drago". Das chamer als Medizin bruche fuer praktisch alles.. wenn mers uf de Huut iribt als Salbi, denn wirds sogar wiss. Denn hemer na en Baum gseh, wo meega dicki Wurzle gha haet. Unser Fuehrer haet uns erklaert, dass wenn mer sich im Urwald verliert und uf sonen Baum trifft, denn mues mer ganz fescht drahaue mit me Stock und denn ghoert mer das mehreri Kilometer wit! Denn simer ufen Baum troffe wos e so en oranschigi Frucht gha het. Jemand het denn gfraget was das fuer en Frucht sig und de Klever (unser Fuehrer) het die denn kurzerhand abgschnitte und uns allne zum probiere gae^^ Hehe denn het er es Farnblatt gna und so zunere Krone gformt. Denn het er eini us unserer Gruppe usgsuecht und zur "Reine de la selva" ernannt. Hehe si het denn au na muesse so Bluete als gfakti Lippe alege und es haet denn recht luschtig usgseh^^ Denn simer witer und de Klever het us duenne Liane en Kreis gformt. Die het er denn ueber sini Fuess tah hinde und haet sich mit de Haend ame Baum festghebt und isch denn so de Baum derufkletteret. En Typ us unserer Gruppe hets denn au versuecht aber isch immer wider am Baum abegschliffe^^ isch ebe doch ned so eifach wies usgseht^^ Denn simer wider witer und neumet anecho, womer haet choene Lianeschwinge:) Aso hehe es isch chli gfaket gsi, es isch ganz es dicks Seil gsi und kei echti Liane, aber Spass hemer glich gha^^ Mer isch denn so chli ufen Erhoehig gstand und vo ded de Knueppel wo unde am Seil agmacht gsi isch, zwuesche Bei gna und druf gsesse. Denn haet mer sich fuereschwinge lah so voll in Urwald use.. Mer isch sich denn scho grad fasch chli wie de Tarzan vorcho.. hehe nei seich^^ Denn isches leider au scho wider verbi gsi mit em Dschungelspaziergang und mir sind wider zrug zum Boetli. Mit dem simer denn anen anderi Stell gfahre und ded hend d'Fuehrer uns es Floss baut. Mit dem simer denn wider zrug zum Hotel gfahre. Hehe isch chli en nassi Aglegeheit gsi, denn das Floss isch knapp ueberem Wasser gsi^^ Denn simer ga Zmittag esse, wider mit me riiese Buffet:) Am Namitag isch denn Besichtigung vome typische Hus vom Oriente agseit gsi. Es paar sind echt so idiotisch gsi (sorry.. aber ich chas echt ned verstah..) und sind lieber im Hotel bliebe zum in Pool ga bade. Ja mir sind emel denn mit em Boetli wider anen anderi Stell und vo ded 5 minute zume Hus gloffe. Unterwegs hend uns d'Fuehrer erklaert, dass ded hauptsaechlich Banane, Yuca, Mais und Cacao abaut wird. Sie hend uns denn au na en Frucht zeigt, wo aehnlich wie en Kastanie usgseht. Die Frucht het innedra so chlini Kerne und wenn mer die verdruckt, enstaht roti Farb. Mit dere hends denn de Koeniginne (womer am Morge im Dschungel ernennt gha hend) oepis uf s'Gsicht zeichnet und nacher au allne andere wo hend welle:) Denn simer ebe bi dem Hus acho. Das isch ned direkt ufem Bode baut, denn all 10 Jahr ungefaehr ueberlauft de Fluss mega heftig und ded staht alles unter Wasser. Im Hus hends uns denn zeigt, wie Chicha hergstellt wird. Es git zwar verschedni Arte zum das herstelle, aber sie hend uns eifach eini defo zeigt. Nacher hemer defo choenne probiere, aber mir hends ned wuerkli gern gha^^ und das wird den stahglah hends uns erklaert, bis das chli vergaert und sich Alkohol bildet. Das hemer denn au wider doerfe probiere, und das isch na schlimmer gsi^^ unseri Fuehrer hend denn en ganzi Schuessle ustrunke und erklaert, dass das immer so isch wenn jemand uf Bsuech chunt. Wenn de Gast ned alles ustrinkt, denn ischer s'naechst Mal nuem willkomme! Denn simer uf de Platz vorem Hus und ded hends uns erklaert wie das funktioniert mit em Jage. Die benutzet so es mega langs Rohr und ded tuends denn en chline Pfiel dri. Uf de andere Site wird denn so kurz driblaset und denn set s'Opfer troffe werde^^ Denn simer wider zum Boetli und mit dene zum Dorf grad bi unserem Hotel gfahre. Ded het uns en Iheimischi demonstriert, wie Toepferei da funktioniert. Nacher simer heigloffe und ga Znachtesse. Hehe und ploetzli het eini voll losgschraue, denn es haet en riesigi Spinne am Bode gah:D Hehe jaa und da ich gern Spinne han, bin ich natuerli sofort here und ga foetele^^ nachem Znacht simer chli is Zimer ga usruhe und dusche und denn simer is Dorf, wil unseri Fuehrer uns iglade hend zum mit ihne id Disco z'ga. Es sind na recht viel vo de Ustuschschueler mitcho und mir hends denn au voll luschtig gha bim tanze und ide Karaokebar:) Ja und denn simer irgendwie so am 3 hei^^ Hehe nach zimlich wenig Schlaf simer ga Zmorge esse und denn wider mit em Boetli ane anderi Stell. Vo ded us simer denn de Amazonia park ga bsueche. Die hend ded Affe, Papageie, Schlange und na vieli anderi Tier. Sie versuechet au die Tier wider id Freiheit entzlah. Ded hets Fraue und Maenner vo Duetschland, Schwiz, Frankrich und andere europaeische Laender, wo ded es Praktikum machid. Ja ebe denn simer ded umegloffe und hend all die verschiednige Tier gseh:) Die erklaeri denn besser bi de Foetelis^^ Nacher simer zrug zum Boetli und mit dem zume andere Fluss, wo chli ruhiger gsi isch. Ded hemer denn so en grosse Schwuemmreife gna und sind de Fluss derab:D witer unde simer denn wider is Boetli und hei ga Zmittag esse. Au a dem Tag sind die gliche wo am vorherige Nachmittag dihei bliebe sind, de gaaaanz Tag ned mitcho!! isch ja eigentli ned mis Problem, aber ich ha mich nu gfragt wie mer das cha mache!! ich ha jedi Sekund gnosse wo mer irgendwie was gmacht hend!! Ja am Namittag simer denn i sones Papillorama. Ded hends uns erklaert wie das so mit Raupe und Puppe funktioniert. Es het ded 22 Arte vo Schmetterling gha und natuerli het jedi Art en anderi Puppeform. Er het und denn erklaert werum manchi gruen oder brun oder sogar silbrig sind. Nacher hemer ded na chli choenne umelaufe und d'Schmetterling gfoetelet. Je meh Zit mer mit unsere Fuehrer verbracht hend, desto meh hemer mit ihne gred. De Carlos, de isch 20i und mit ihm hend d'Rahel und ich uns voll guet verstande. Er isch staendig am umewitzle gsi und het uns sogar es paar Woerter in Qichua bibracht, das isch ded d'Sprach mit dene sich d'Luet verstaendiged... Hehe ich find die Sprach mega cool, mues ihn denn nach chli mehr Woerter frage^^ So quasi als Abschied hend denn unseri Fuehrer i some typische Hus na gsunge und tanzet. Si hend di typischi Kleidig agleit und selber Musig gspielt und gsunge:) Isch mega herzig gsi:) Ja nacher simer denn allzaeme heigloffe und ga Znacht esse. Am Abig sind irgendwie all im Hotel bliebe, aber d'Rahel und ich hend denkt, ja ez hemer so en schoeni Zit gha, ez muemer scho na chli ga Party mache^^ Denn simer so is Dorf und chli umegloffe. Denn simer a so en Ort cho, wo di Junge Fuessball gspielt hend. Womer dene so zuegluegt hend isch denn de Klide (de aelter Brueder vom Carlos wo au als Fuehrer schaffet aber ned fuer la casa del suizo) cho und het chli mit uns afange rede. Wo mir denn gseit hend, dass mir us de Schwiz sind het er uns sis Herzli usgschuettet, denn er haet en Fruendin us de Schwiz gha bis vor es paar Wuche. Hehe und mir wuessid ez wie alles agfange haet, was si alles zaeme erlebt hend und werum si usenand sind^^ Nach dem Gspraech haet er gfraget ob mir chli id Disco wellid und natuerli hemer welle^^ Denn simer mal ga luege, aber es haet na voll kei Luet gha.. Mir hend ihm au ned welle uf d'Nerve gha und hend deshalb gseit, dass mir mal zum Hotel zruggoend zum frage ob na anderi choemid. Und grad womer so am Ufelaufe gsi sind, isch uns de Carlos entgege cho. Denn simer mit ihm na chli im Dorf umegloffe und spaeter wider id Disco. Denn hets scho zimli meh Luet gha und ja denn hemer mit ihne tanzet und en voll easy Abschlussabe erlebt.. Hehe ich chans nu immer wider saege, die hend da s'tanze scho im Bluet..!!:D Ja und au wider so am 3 het er uns denn zum Hotel begleitet und mir sind ga penne. Am naechste Tag simer zimli mued gsi, aber dasch au ned witer schlimm gsi denn mir hend wider 6h Busfahrt vor uns gha. Womer denn in Quito acho sind, sind d'Rahel und ich eifach was ga esse und chli ide Naechi vom Hotel umegloffe und denn simer au scho ga penne, da mir recht mued gsi sind. Ah ja hehe und womer vom Hotel casa del suizo mit em Boetli abgfahre sind und denn uf de andere Site so in Car igstiege sind, merkid mer ploetzli das na 4 Luet gfehlt hend!! Denn het eis Boetli wider zrugmuesse zum die na ga hole^^ Es isch ebe so gsi, dass d'Chefin ned mitcho isch. Nur so en Representative vo Riobamba wo Cecilia gheisse haet. Und die haet alles zimli locker gseh^^ mir haettet weder in Quito id Disco, na im Oriente so lang weg bliebe dafe. Und eigentli wer s'Programm obligatorisch gsi und es haettet ned eifach es paar 1,5 Tag choene diheime bliebe.. Aber ja hehe da chunt halt vo Person zu Person ah.. Und huet am Morge hend denn mir vier chicas vo Cuenca am 5i usem Hotel muesse und zum Terminal, da unser Bus am 6i gfahre isch... Ja und die 10h sind denn zimli ereignislos gsi, ussert dass mer en schreiende Gof gha hend im Bus und am Endi all heilfroh gsi sind entli choene usstiege!!^^ Ja ebe und ez han ich denkt ich choent doch das alles ganz fruesch erzaehle und grad is Internet ga, da ich momentan sowiso nuet gschieders mache cha weder uf de Strass umehaenge^^ Aber ich freu mich nacher choene hei ga und ga dusche... Viellicht chumi sogar na huet Abig dezue zum d'Foeteli drufzlade.. Ja anyway... Also de Dschungeltrip het mir echt andersch gfalle und ich ha gar nuem zrug welle!! Dasch eifach so en anderi Welt ded...! Ich han soo guet choene abschalte und das ganze Drama vo wege Familiewechsel choene vergesse und eifach nu mit me Smile umelaufe:)

witeri Föteli vom Weekend, diesmal vor Rückfahrt

Aso ich weiss ned gnau wie mers schribt, aber das wär de Vulkan Chimborazo. Dä isch chli südlich vo Latacunga, ufem Weg richtig Ambato.

Das isch i dem iheimische Dörfli. Grad ded wo das Zügli abfahrt, häts meega viel Ständ mit Kleider vo da. Natürli hämer uns all en Huet gschnappet und Fotisession gmacht^^

Das isch das Dörfli (weiss au da ned gnau wie mers schribt^^) Alausy, ebe das iheimische Dörfli. Dasch so voll zmitzt zwüsched de mächtige Berge. Und ide Mitti vo dem Dorf häts en Hügel (dä isch da eher chli hinde) und ded häts en Statue druffe.

Ja uf de Föteli gsehts irgendwie nie so heftig us wie in Wirklichkeit... aber die Berge da sind riesig und gsehnd mega mächtig us!!! Mer chunt sich da so chli vor... aber ebe irgendwie bringt das Foti das ned würklich übere...:)

Föteli vom Fäscht "La Mama Negra"

Also das wär d'Mama Negra^^ Dasch grad nach de Chile, da sind alli verkleidete Lüt z'letscht usecho und de Gustavo hät gmeint ich mües unbedingt frage, ob ich es Foti mache daf^^

Ja das isch eigetnli ned bsunders vo dem Fescht, aber mal entli en Glägeheit gsi, zum zeige wie die da s'Ässe so am Strasserand verkaufid und vor allem so s' ganze Schwein...^^

Ja dasch dä scho während em Umzug. D'Lüt händ di indigene Kostüm agleit, welchi sehr farbig sind. Denn wird so als Umzug d'Strass entlang spaziert und natürli viel tanzet:)

Da namal es paar anderi traditionelli Trachtene vo chli nächer und natürli gnau denn gfötelet, wenn si sich dreiht händ^^

Namal settig Trachtene - diesmal Männer und Fraue

verlängerets Weekend

Ja die letschte paar Bricht sind ez ned so ganz chronologisch^^ Aber chömid mer zum Weekend. Wie scho gseit, sind mer am Dunschtig Namitag dä richtig Latacunga ufbroche. Das isch meh geg Norde, so ungefähr 6h vo Cuenca entfernt. Vo ded sinds dä namal knapp 2h bis nach Quito. Ja abgseh devo dases chli langwilig gsi isch, isch alles guet verlaufe. Mir sind dä so am 11i ir Nacht bim Hus vo de Mueter vo minere Gastmueter acho (das heisst bi minere Gastgrossmueter^^). Es sind mini Gastmum, de Gustavo, mini Gastschwö und na irgend so en Verwandti wo glich alt isch wie mini Gastschwö, d'Ana-Christina, uf Latacunga. Womer acho sind, simer zersch mal ga penne. Phuu und es isch arschkalt gsi... ich glaub, deshalb han ich mich denn au bescheide verkältet, denn am nächste Morge hani mega Kopfweh gha und mich uh schlecht gfühlt... ich has denn minere Gasteltere gseit aber die händ das ned bsunders ernst gna. si händ mich denn es paarne Kollege vorgstellt und ir ganze Stadt umegfahre und mis Kopfweh isch nu na schlechter worde... Am Abe händs irgend a sones Fäscht welle mir traditioneller Musig und eigentlich find ich so Sache ja würkli intressant, aber mir isch so scheisse gange, dass ich echt dihei ha welle bliebe... si händ denn mit Widerwille gseit, ich chöng diheime bliebe... ich bi dä eifach chli im Bett gläge und ha ir Nacht au ned würkli gschlafe, aber immerhin so chli dunkel und Rueh hät scho zimli Wunder gwirkt und am Samschtig isch mer scho viel besser gange. Am Morge simer denn id Chile gange (dasch au so wider en Punkt gsi, wo mer gmerkt hät, dass sich d'Beziehig verschlächteret hät... denn am Afang hani nu s'erst mal müesse mitga, wo si nani gwüsst händ, dass ich ned gern id Chile gang. Aber a dem Samschtig händs eifach gfunde ich chiem ez au mit...!) Ja und nacher häts ded so es Fäscht gha. Das isch all Jahr und nu in Latacunga und Umgebig und das heisst "La Mama Negra". Ded verkleidet sich d'Lüt mit traditionelle Kleider und laufid entlang de Strass chli so wie bi uns Fasnachtsumzüg. Si tüend denn tanze und au chli Scheiss mache, und was natürli au wider dezueghört, isch trinke... Die laufid mit Likörfläsche ume und schenked allne ih und zwinged si richtig gehend zum trinke!! Es hät denn dementsprechend au recht viel Bsoffni gha am Schluss... Denn isches witerbruch, dass im Hus vo dem wo d'Mama Negra gsi isch, für all kochet wird. Denn simmer ded ga ässe und nacher wird natürli tanzed. Und au ded isch meega viel trunke worde... Tuet mer leid, dass ich das immer erwähne, aber es wird würkli übertriebe viel trunke!! Mini Gastmum hät mir immer verbote z'trinke aber ded hät si gseit mer müeses anäh, au wenn mer denn nu dra nipped... Si hät denn ämel au ned schlecht abeglärt und isch am Schluss au recht atrunke gsi:P Am Abe simer dä hei und ga penne. Und am Suntig simer scho am Morge am 8i abgfahre, denn mir sind ir Nächi vo Ambato duregfahre und witer nacher dur Riobamba, womer denn zmittag gässe händ. Vo ded simer nach Alausy (dasch so es Dorf mit Iheimische und vo ded häts au en Zug vo uf en bsundere Berg ufefahrt). Au hani de Cotopaxi und de Chimborazo gseh (das sind zwei Vulkan da in Ecuador). Und Ändi Namitag simmer denn da acho und ja ez bin ich da am Schriebe und bi grad chli im Stress wil mini Gastmum s'internet brucht. Deshalb werdid d'Föteli ame andere Tag folge...

Shisha Abig =)

Ja hehe so vo wege Shisha... Entli bini mal dezuecho zum Shisha rauche da in Ecuador... Die händ da ebe so es paar Lokal, wo mer cha Shisha rauche. Denn niemert hät eini diheime. Ja und letscht Mittwuch sind denn Kelly, d'Rosita (Kollegin vo de Kelly) und de Alfonso da in Cuenca gsi. Dä hämer uns troffe und sind is Zentrum ga Shisha rauche:) Mini Gastmueter isch ja recht streng und ich bi ersch so uf di 5i is Zentrum wil denn Kelly cho isch und de Alfonso sogar ersch uf di 6i. Denn simer so am halb 7ni ga Shisha rauche und händs chli ghängt und denn hät de Alfonso gseit, dass sin Kolleg de Coco Kelly und Rosita zum Flughafe und mich heifahre chöng. Aber nacher hät de Coco irgendwie zu sinere Grossmueter müesse und uns drum ned chöne heifahre und deshalb händ mir denn es Taxi müesse näh. Und da Kelly und Rosita na bis uf Gualaceo händ müesse und natürli de Bus ned händ dörfe verpasse, simer zersch zum Terminal gfahre und denn hät mich de Alfonso na im Taxi heibegleitet. Und grad wo di andere usgstiege sind hät mini Gastmum aglüte und gfragt weurm ich nani heicho sig und blablabla... dä häts mi grad voll agschisse heizga und deshalb simer ei Strass nach mim Hus usgstiege und dä hani na chli mit em Alfonso gschnurrt und mich häts uh ahgschisse heizgah^^ ja irgendwie am halbi 11i hät er dä gfunde er set mal heigah, wils nacher sunsch chli gfährlich wird allei im Taxi... ja und ich bi dä au mal hei und mini Mum hät mich dä au mit de entsprechende Mine empfange^^ aber i dem Moment isch mir das ehrlichgseit soo egal gsi... denn ich bi mit glichaltrige dusse gsi und die dafid all au so lang use, aso cha si das au akzeptiere...:) ja ämel isch de Abig voll cool gsi:) und übrigens hämer Shisha mit Milch anstatt Wasser graucht. Das hani ide Schwiz na nie probiert^^ isch eigentli gar ned so schlecht, denn es verstärkt irgendwie de Gschmack vom Taback;)

betreffend Familiewechsel

Ja aso letscht Wuche hani nüt gschriebe wil es isch grad chli hektisch zue und her gange... aso es isch i dere Form stressig gsi, dass ich halt jede Tag drufgwartet ha wie das ez usechunt vo wege Familie wechsle und das hät mi scho chli beschäftiget... Denn es hät au ständig was anders gheisse... Zersch häts gheisse, dass s'gröschte Problem si wird, d'YFU Representative z'überzüge, dass ich überhaupt Familie wechsle cha. Denn häts gheisse ich chöng, aber nur innerhalb vo Cuenca wil ich ade gliche Schuel bliebe muen und denn isch leider na de Ruth (YFU Representative) ihre Ma gstorbe und deshalb schaffet si ir nächste Zit ned... so isch das ganze zimlich kompliziert worde und ich bi ständig i dere Ungwüssheit gsi... Am Dunschtig wo ich vor Schuel heicho bi han ich dä de Chefin vo YFU, de Ximena, in Quito müesse alüte, zum mal na mit ihre rede. Ja und si hät denn zersch gseit ich sells na chli probiere und so und mit de Gasteltere rede, aber ich ha ihre dä gseit, dass ichs scho probiert ha und dases würkli ned funktioniert und dass ich au ned ungern Schuel wechsle wür und alles so. Ja und si hät dä plötzli gfunde es sig keis Problem, es brüchi halt eifach chli Zit, bis das alles organisiert sig... Naja und da mir am Fritig frei gha händ, hät mini Gastmueter mir am Dunschtig am Morge gseit gha, dass wenn ich heichume grad mis Züg packe muen, denn mir gächid uf Latacunga. Wie gseit, han ich denn de Ximena aglüte woni heicho bi und nacher simer uf Latacunga. Ich bi ned so wahnsinnig begeischteret gsi s'ganze Weekend mit minere Gastfamilie z'verbringe, aber isch mer ned gross was anders übrig bliebe. Da mir d'Ximena au verbote hät, minere Familie was defo z'säge, dass ich wechsle möcht... Dasch chli schwierig wil denn lebsch eifach so ide Familie und weisch du möchtsch wechsle... und ehrlichgseit isches au immer schlimmer worde unseri Beziehig und deshalb mues ich mich teils recht zämerisse nüt z'säge... aber ich hoffe, dass de Zitpunkt gli mal cho wird... denn si redid immer so vo wege ja im November machid mer denn das und denn das... und ich mues eifach lächle und mer nüt amerke lah...

Föteli vom Weekend in Gualaceo

Ja das sind eigetnli so die, mit dene ich s'ganze Weekend zäme gsi bi und mit dene ich au ez na Kontakt ha:) Vo links wärid das de Pablo (de Gastbrüeder vo de Kelly), ide Mitti de Santiago mit Übername Chanta und dä Alfonso so vo rechts^^

Ja das sind eigetnli ebe so d'Leuts us Gualaceo:) Die sind all mega lieb und ja da ich da in Cuenca fasch nie use daf hani da au ned so Kollege... Aber die vo Gualaceo studieret da in Cuenca und sind deshalb au ab und zue am Namitag ide Stadt und dä chömer uns amig kurz gseh:)


Ja da simer z. B. in Habbibi gange. Dasch so es Lokal womer cha Shisha rauche^^:)

Gualaceo zum 2... und hoffenlti für immer:)

Das Weekend isch s'beschte Weekend wo ich verbracht ha, i dere Zit wo ich scho in Ecuador bi. Aso ich mues da chli ushole, wil praktisch niemert ussert mini Eltere und d'Fla i das igweiht sind. Alsoo ich ha da ned würkli problem mit de Familie, aber sind mer recht verschiede und ich chum mit dene ihrere Art ned so ganz klar... Am Afang hani denkt, ich mües mich eifach apasse. Aber ez hani gmerkt, dass es würkli ned bringt und ich gschieder Familie wechsle. Am letschte Mittwuch hämer Reunion gha vo uns 4 Ustuschschüeler wo mit YFU in Cuenca sind. D'Kelly vo Estland isch mit ihrem Brüeder und dem sim Kolleg cho. Dä hämer so chli vo de Familie gred und ich ha gseit, dass ich voll ned z'friede sig und so. Ja und dä händ si sich mega müeh gä zum en Familie sueche und händ au gseit, dass si mich für s'ganze Weekend nach Gualaceo iladed (Kelly wohnt ebe ned direkt in Cuenca sondern in Gualaceo). Ja und dä bin ich am Fritig Namitag nach Gualaceo gange und ez am Sunntig Abig wieder zrugcho:) Jaa und wo ich am Fritig acho bi, händ si mer grad en Chica vorgstellt wo Diana heisst und ihri Familie bereit wär mich ufzneh:) Si sind voll ned so rich wie mini ezig Familie, aber defür sooo viel sympatischer. Au isch d'Diana 17ni und ihre Brüeder 19ni, das heisst ich wür Gschwister im gliche Alter ha. Au händs 2 Hünd und momentan na öpe 6 Jungi:):) Dä händs au en Katz und händ Tier au sunsch mega gern und ah es isch eifach en Traum:) Ich bi dä chli mit ihre ga rede zum luege ob mer di gliche Asichte händ und mir händ uns uf Ahieb grad super verstande und ich ha hüt gar nüm zrug nach Cuenca welle... Ja und nach dem simer dä am Abig na chli usegange. In Gualaceo häts voll ned so Discos, defür voll gechillti Bars:) Dä simer i sone Reggaebar gange und händ Kollege vo de Kelly und ihrem Brüeder, em Pablo, troffe. Das sind voll gechillti Lüt und ich verstah mich andersch guet mit ihne. S'einzig was mer ned so gfallt, isch dass si andersch viel sufid... Ich bi immer am nei säge und irgendwie häsch glich ständiges volls Glas vor dir... Aber ein Typ, de Alfonso, dä isch aandersch nett:) Er hät dä au immer gseit, löhnd si doch in Rueh wenn si ned wil!!:) Ja und denn hät de Pablo gseit, dass mer ned allzu spat hei settid, damit mer am Samschtig chli länger weg chönd. Am halbi 3 hät er dä mal gfunde mer sellid mal richtig heizuegha, mir chöngid dä na ufem Parkplatz vorem Hus chli sufe. Und ich so denkt, was namal suufe?^^ Dä simer ufem Heiweg na Wie ga chaufe und dä hämer s'Autoufgschlosse Musig agstellt und de Wie trunke^^ De Pablo isch dä recht däne gsi und hät au müesse chotze^^ nacher hämeren müesse z'Hus deruf träge und is Bett legge^^ mir sind dä schlussendli am 4i im Bett gsi^^ (für mich ned grad früeh, wie er gmeint hät, aber umso besser für uns^^) am nächste Morge hämer dä au chöne bis am Mittag im Bett umehänge (wo ich bi minere ezige Familie am 8i muen Zmorge ässe:P). Später hämer dä Zmittag gässe und am Namitag sind mir Junge chli an Fluss ghöcklet und chli ga umelaufe. Ah ja de allgemeini Treffpunkt isch da immer de Park. Wenn ned weisch wa mache gasch eifach mal ded hi und dä triffsch ständig jemand ah. Und en anderi Macke isch, dass die da ständig irgendwelchi Autos vo de Eltere oder Verwandte uslehnid und denn eifach ir Stadt umefahrid^^ Ja und am Samschtig simer dä ga Fleisch und Salat und Chips und so ga poschte zum es Barbecue bi eim diheime z'mache. Ded sind dä de Pable, Kelly, de Coco, de Alfonso und ich gsi. Hehe jaa und mit Choche händses ned so im Griff gha^^ Die händ ned mal gwüsst wie mer de Salat schniide mues^^ Da händ mir Fraue dä chli müesse z'Werk ga^^ Aber isch dä gar ned mal so schlecht usecho:) Ded hani dä au chli meh mit em Alfonso gred, denn dä isch echt voll en gechillte Mensch. Er hät di glich Asicht wie ich vo de Religion und de Chile und so Züg:) Aber was mer ned so gfallt, isch dass er s'Colegio gschmisse hät kurz vor Schluss und drum ez momentan nüt macht!! Zersch hanis ned glaubt, aber dä hängt echt nume jede Tag dihei oder im Park ume!! Das mues er na ändere:) Es git irgendwie en Möglichkeit, dass er Prüefige cha nahhole und dä chaner ad Uni ga, wener die bestaht. Ich binen grad chli am bearbeite^^ Denn er isch würkli intelligent, und ich chan ned mitaluege wenn sich Lüt i mim Alter Zuekunft versauid... Ja nach dem Barbecue simer wieder i die Reggaebar wo Freedom heisst gange. Und denn hämer na es paar anderi Kollege troffe und die händ dä gfunde, mir chöntid doch Trinkspieli mache... Phuu mer händ recht viel abegleert... Aber zum Glück han ich ned so oft verlore, dadurch han ich ned so viel müesse sufe^^ Nacher simer na ane Party gange. Aso irgendwie isch das so weiss au ned gnau aber so öpis wie erst Kommunion gsi... Ded häts dä au wider voll viel z'Sufe gä. Und tanzet hämer:D Buuuah ein Typ, de Rony, dä cha aaaandersch guet tanze!!! Mir händ praktisch de ganz Abe zäme Salsa und Merengue und Bachata tanzet... So Fiestas sind da voll geil, ned so langwilig wie bi uns wenn di ganz Familie da isch..:) Ja und zwüschedure simer wider abe wo mer so Stüehl higstellt händ und mir Junge chli ghöcklet sind und gschwätzt händ:) Nacher hani wider chli mit em Alfonso gred und es freut mi voll, da jemand gfunde z'ha wo voll di gliche Asichte hät:) Und d'Sprach isch ned mal so es Problem, er verstaht ämel immer was ich säge und korrigiert mich au und so:) Denn bini na mit ihm chli ga tanze, aber er häts ned soo im Griff gha;) Aso ja vergliche mit Type vo bi uns, da chönd recht wenig Partnertanz (ussert natürli de Simi, de Ludi und de Ivooo:):)^^) aso ebe mit dene vo bi uns vergliche hät ers scho im Griff, aber vergliche mit em Rony...^^ Aber de Alfonso lost ebe au eher elektronischi Musig oder natürli the doors und so^^ isch ämel mega süess gsi wie er sich da so Müeh gä hät:) Ja und irgendwie isch Zit da ja ned würkli wichtig^^ ämel simer dä mal einisch heigange und womer so i Bett liged gsämer plötzli, dases hell isch!!!!! Dä luegid mer so uf d'Uhr und es isch eifach scho 6i gsi^^ Ja nacher simer dä ga penne und am nächste Mittag wieder gässe und dä simer chli in Park. Und dän isch mir voll di peinlich Aktion glunge^^ Es git da eine, dä heisst Santiago. Und euse Volunteer vo YFU heisst au Santiago. Ja und denn han ich em Santiago aglüte, wil ich ha welle frage öp mer chönd rede, wil ich es Problem heig. Denn hät er gseit ja sicher. Dä hani gseit ja mir chöntid ja am Abe rede, denn sig ich wider zrug in Cuenca. Und er hät denn gfunde ja er sig in Gualaceo mir chöntid ez rede. Ja und denn simer ebe in Park und händ gwartet. Denn isch de Kolleg vom Pablo, de Santiago, cho. Dä hämer chli gred und so und ich bi da schier gstorbe vor Nervosität und denn seit de Pablo so, ja chum schrieb am Santiago mal es sms... Dä hani ihm so eis gschriebe und dä seit de Kolleg vom Pablo so, ou ez häsch grad mir eis gschriebe..! Denn händ mir usegfunde, dass ich ständig mit em falsche Santiago gred ha^^ hehe ja di andere händ sich denn z'todglachet und mir isches bescheide peinlich gsii:P Ja nacher simer wider i die Bar und ich ha mich eigetnli na mit em Alfonso verabredet gha zum chli schnure, aber er isch dä mega lang ned cho und denn han ich wider zrug nach Cuenca müesse.. Ja denn sind de Pablo und ich zäme im Bus zrug nach Cuenca, wil er unter de Wuche da lebt wil er da studiert. Ja und eigentli han ich mit em Santiago wo YFU na abgmacht, dass mer am Abe na redid, aber er hät sich bis ez ned gmulde... Ich hoffe mir chönd morn rede, denn ich möcht ihm echt säge, dass ich Familie wechsle möcht. Das Weekend isch soo gechillt gsi und ich ha soo viel netti Lüt kenneglernt.. settig wo eim würkli schätzed und mit dene mer voll easy rede cha:) und au isch Gualaceo viel chliner wie Cuenca und es hät viel meh Natur und es isch weniger gfährlich, wil all sich kennid... Wuah ich wür am liebschte grad ez wider zrug nach Gualaceo und eifach mit dene Leuts hänge:) Aber leider mues ich morn da wieder id Schuel... und denn das mit em Gspräch mit em Santiago und de Ruth id Weg leite... Denn na mit minere ezige Gastfamilie rede... und hoffe, dass alles funktioniert...phuu wür mi echt riiiesig freue:) ja ich ha leider kei Föteli gmacht, aber Kelly scho.. si schickt mer si dä mal per mail und dä chani si uf min Blog tue:) Isch amig chli angämer wenn mer Näme mit Bilder verbinde cha...:)