Föteli vom "Campo"

Ja natürli müends mich ständig uf s'Föteli pflanze^^ aber so oft wies gaht versuech ich au eifach so Fötelis z'mache^^ hehe au wenn ich mich ez wiederhole, aber ich find die Wulke da so geil:)

Ja da isch na chli vo de Landschaft:)

und namal chli Landschaft^^

Sunntig

Ja am Sunntig simer so Meeresfruchtzüg ga ässe ines Restaurant mit de gsamte Familie. Muschle, Krebs, Crevette und alles so Züg und natürli mit enere Tonne Ries^^ Nacher simer mit em Auto chli (si sägid da Campo, dasch halt so chli ufem Land) usegfahre zum cha Käs und Jogurt kaufe. Ded hani dä au na es paar easy Fötelis chöne mache und wider chli meh vo de Landschaft gseh:) Denn simer zunere Kollegin vo minere Gastmueter und händ ded Kafi trunke und chli Snacks gässe. Am 5i händs s'Resultat vo de Wahle bekannt gä und dä simer alli vor de Fernseh gsässe. Ich has dä recht amüsant gfunde, wil mini Gastmum isch voll für s'Nei gsi und s'Ja hät mit irgendwie 68% zu 25% gwunne, aso zimli e klari Sach^^ Au hät i keim Departement und keinere Stadt s'Nei gwunne. Quasi überall hät s'Ja gwunne, ussert in Guayaquil hät mit de Nulos und Blancos s'Ja ned gwunne. Mini Gastmum isch nacher au dementsprechend glunt gsi und hät gfunde si zieh zu mir id Schwiz:P Ich persönlich cha ned ischätze, ob das guet oder schlecht isch. Denn dur s'Ja hät de President Correa mehr Macht. Aber ich weiss ebe ned, wie guet er regiert. Denn wenn er guet regiert, denn isches gar ned schlecht dass s'Ja gwunne hät. Wil so gits sicher mal en Wechsel. Aber naja, ich gseh ja wieviel oder was sich ändere wird:) Nacher simer dä mal hei gange und dä bini ga penne:) Und hüt bini ide Schuel mit em Lehrer wo uns in Contabilidad und Economia unterrichtet ga rede und na mit de Lehrerin vo Mercadeo. Denn Marketing intressiert mi ehrlichgseit ned so und die Fächer findi bsunders langwilig. Deshalb bin ich si ga frage, ob ich i ihrne Stunde ned eifach chönt irgend en anderi Arbet uf Spanisch mache... Si händ gseit mir tägid morn namal rede (so wie d'Lüt da sind: voll ungstresst:P) ja uf all Fäll würs mi voll freue, wenn das klappe wür:)

Cuenca

Aso das wär en Teil vo de Ussicht us mim Zimmer. Im Hintergrund gseht mer di schöne Berge:)

Ja das wär en Teil vo de Berge chli nächer:) Phuu jede Morge wenn ich ufstahne unds schöns Wetter isch, dä wür ich am liebschte eifach en Rucksack schnappe und ded ga wandere...:)

Ja das gseht mer au us mim Zimmer us. Die Strass wo vo rechts her chunt isch d'Hurtado de Mendoza, en Hauptstrass. Ja hehe ha denkt da gsehnd ihr au na chli wie d'Hüser da sind, oder ja wies eifach usgseht:) Und ez isch mer na grad ufgfalle, das mer rechts unde im Bild gseht, wie d'Schilder sind mit de Strassenäme:) (müend viellicht uf s'Bild klicke, damits chli grösser erschint)

Ja das wär denn ebe en Teil vo Cuenca, wo mer vo Turi us gseht. Da Cuenca ned grad chli isch, hät halt ned alles uf eim Bild platz. Aso ja hehe d'Lüt vo Cuenca findet d'Stadt chli^^

Dasch au vo Turi us, aer eher chli nach rechts gfötelet:) da gseht mer au guet, dass eigetnli um di ganz Stadt ume Berge sind. Aber ja s'Föteli isch ned so guet, wils scho chli am idunkle gsi isch und drum ned so scharf usecho isch...

Wuchenändi

Am Fritig Abe hät mini Gastmueter mich dä gfragt ob ich wet mitcho zum paar Sache ga erledige und nacher würid mer na uf Turi ga, dasch so es Kaff wo zu Cuenca ghört aber chli erhöht isch und vo ded gseht mer uf di ganz Stadt abe. Ich bi de mitgange wil ich denkt ha, so chani chli Föteli vo de Stadt mache zum euch zeige^^ Ja ämel simer de i allne Ikaufszentrum umedüsed und phuuu ich ha ja mal gseit, dass die da scho Wiehnachtsschmuck verkaufid... I dem Ikaufszentrum isch sogar scho en vollgschmückte Baum gstande!!! (aber künstliche Baum natürli^^) Ja später simer denn uf Turi gange und dasch würkli en herrliche Usblick... Es isch so am idunkle gsi, drum sind d'Föteli ned soo super usecho... Aber in echt isches würkli en herrliche Usblick gsi... was mir da am beschte gfallt isch s'Wetter. Aso am Morge weiss ich niiie was für Wetter wird^^ mengmal isches voll bewölkt und hät so chli wie Hochnäbel wo Berge voll ihüllt. Aber plötzli riessts uf und isch knallblaue Himmel und wulkelos. Denn gseht mer au all die mächtige Berge rundume und weiss, werum Cuenca (=Becken) so heisst:) Aber d'Sunne brennt da echt übelst stark... Letschti bini nu öpe en Stund ade Sunne gsi und ich ha mer üüübelst de Kopf und de Scheitel verbrennt!! und bi de Ärm gseht mer de Abdruck vom T-Shi^^ Was aber würkli wunderschön isch, sind d'Wulke. Mer cha i ei Richtig luege, und ded häts Cumuluswulke wie usem Bilderbuech - echt wie wenns gnau ded hi zeichnet worde wärid. Und dä chamer i di ander Richtig luege und ded sind d'Wulke so verzoge und rabeschwarz... und mengmal krützet die sich und dä gits so mega komischi Sunneistrahlig... das gits bi uns ja scho au, aber eher selte. Da isches fasch jede Tag so, wil mer a eim Tag meischtens vo herrlichem Sunneschii bis zu Rege hät...
Ja aso eigentli hani mal vo Turi afah verzelle^^ Hehe und vo ded hät mer sogar is Stadion gseh, wo Deportivo Cuenca grad am spiele gsi isch^^ Ja nacher simer dä hei und denn bini an PC und ha na uuh lang mit de Fla gskypet, bis mir schier d'Auge zuegheit sind.. Denn bini ga penne und am Samschtig morge hani am 8i müesse ga zmorge ässe^^ Ja nacher hani mit em Mami gskypet und dä d'Wösch gmacht und nacher chli is Zentrum. Ded isch mer so en Typ über de Weg gloffe wo so Ohrering und Ketteli und so verkauft. Er hät denn gfraget ob ich was wel kaufe und ich ha nei gseit und nacher hät er gfragt vo wo ich sig und denn hämer chli afah schnure:) Denn simer zäme umegloffe und an Fluss ghöcklet:) Und er hät verzellt, dass er vo Chile sig und grad chli in Südamerika am umereise sig und eifach chli Zügs verkauft oder teils au neumet schaffet zum s'nötige Geld z'verdiene. Mir händ denn voll easy über Geld und di Riche und so gred:) Denn isches mal Zit gsi zum heigah für mich... Am Abe hani denn scho denkt, dasi wohl dihei bliebe wird. Aber denn händ mir de Chumal und de David (Kollege vom Esteban) gschriebe und gfraget ob ich na chli usechum. Ich bi de mit em Taxi zu some Park womer uns troffe händ und dä simer zum David hei, wils dus recht küehl gsi isch. Ja und das sind voll gechillti Leuts, mir sind denn so zu ihm hei und händ ide Stube d'Stereoalag ufdreit und Reggae inetah und denn hämer uns na en Pizza bstellt und händ easy gschnurrt und chillt:) Hehe de David hät dä na d'Landkarte füregna zum luege wo d'Schwiz gnau isch und dä hämer chli gred wer wo gern hi würd... und er hät dä gseit, dass er nächst Jahr uf Frankrich id Ferie gaht und viellicht chunt er denn na gschwind id Schwiz^^ Nacher simer na uf s'Gitarre spiele cho und de Chumal hät unbedingt welle, dass ich ihm "no woman, no cry" bibringe:) Ja und denn bini mal wieder hei...
Hüt sind d'Wahle in Ecuador, und nimmt mi recht wunder, ob s'ja oder s'nei gwinnt... Mini Gastmum isch ez grad ga abstimme und ich ha denkt, ich chönt ide Zwüschezit mal wider Brichterstattig mache^^ Später chunt si mich dä ga abhole und dä gömer was ga Ässe und nacher gömer glaubs en Teil vo Cuenca chli ga aluege so mit Chile und so. Hüt machid mer kei Treffpunkt bi de Grosseltere, wil ja ebe Wahle sind. Und s'ganze Weekend isch kei Alk verkauft worde und es hät au kei öffentlichi Partys gä weg de Wahle.
Wünsch ech allne na en schöne Abe und en guete Start i di neu Wuche:)

Nataly's Geburi

Am Dunschtig hät mini "Cousine" vo da Geburi gha. Si hät gseit, dass si dä chli es Fäschtli macht und mich au ilad. Zersch häts mi chli ahgschisse z'ga wil ja, mir sind chli verschiede... Aber nacher bini glich gange wil ichs ihre versproche gha ha und mini Gastmum mir eh nu erlaubt hät bis am 10ni halbi 11i z'ga... Wo ich dä bi ihre gsi bi sin ihri Kolleginne au scho ded gsi und sind sich voll gägesitig am schminke gsi und am ufstyle. Si händ dä gfunde si chöngid mich ja au na schminke aber ich ha ned welle^^ Ich ha scho denkt, mir gächid na weg, so wie die sich ufgmotzt händ^^ Aber es sind dä eifach es paar Kollege und Kolleginne zu ihre cho. Si hät da voll s'Buffet vorbereitet gha. So mit chline Snaks und Schoggifondue und allem mögliche^^ Und natürli hät au de Alk ned gfehlt. Si hät dä gfunde ich mües unbedingt länger bliebe und hät dä minere Gastmum aglüte zum säge, dass eini vo ihrere Kolleginne so am 12i halbi 1 heigieng mit em Auto und ich bi ihre mitfahre darf. Mini Gastmum häts mer dä erlaubt... und mich häts au ned gstört wils würkli na easy leuts gha hät:) Ich ha dä eine kenneglernt wo en Fründin vo Holland hät und ha chli mit ihm gschnurt. Er hät dä gfunde ich mües mich da chli in acht nä vor dene Machomänner^^ und au sunsch hämer na chli über Cuenca und Ecuador gred:) Und dä isch en Kolleg vo ihm cho, wo andersch guet cha tanze. Zersch hämer chli Reggaeton tanzet, aber nacher hämer so richtig Salsa und Bachata tanzet (aso er häts mir bibracht^^). Isch dä na voll en easy Abe worde:) Ja und Zit isch au zimli schnell vergange wil de isch plötzli 12i gsi, denn halbi 1, denn 1 und ich ha mich scho gfraget ob mich die Kollegin vergässe hät^^ aber schliesslich simmer dä am 2 hei und ich bi todmüed am halbi 3 ga penne und am halbi 6i wider uf^^ isch dä recht en asträngende Tag worde^^

letscht Wuche und Wuchenändi

Ez hani scho chli länger nüm gschriebe:) leider hani di chline Sache woni eigetnli vo letscht Wuche ha welle schriebe scho wieder vergässe... Aber irgendwie gaht ein Tag nachem andere im Flug verbi... und s'Wuchenändi gaht sowiso immer viel z'schnell verbi^^ Das Weekend bini am Fritig uf en easy Party gange wo so chli elektronischi Musig gloffe isch. Eigentli gfallt mer die ned so, aber s'isch so voll strubi Musig gsi.. und uf en Art au voll verhängt.. hät mer ämel recht guet gfalle und hät au voll easy Lüts ded gha:) Ich ha dä sogar bis am 2 dörfe bliebe^^ Am Samschtig hani gfraget obi chli an Fluss daf und dä händs gfunde es sig z'gfährlich.. dä hani gseit ich chönt ja neumet hi wos chli Lüt hät und dä hani für 2 Stund usedörfe.. am Abe hätti eigentli mit anes Hochzit müesse wili am Fritig use ha dörfe, aber wil ich gseit ha, dass ned so mis Ding sig mit Stögelischueh und Kleid umezlaufe hani döfe dihei bliebe. Da hani dä mit em Husmeitli wo übrigens ersch 19ni isch!!! (gseht öpe 10 Jahr älter us..) und de Gastschwö Fluch der Karibik 3 gluegt^^ Ja und am Sunntig simer zu de Eltere vo mim Gastdad. Ded sind dä natürli na sini Gschwüschterti cho und sunsch na mega viel Lüt. Dä hämer zersch kochet nacher gässe und dä chli Fuessball gspielt (sofern mer das Fuessball nenne cha^^) und dä chli gschnurt und dä isch au wieder Abe gsi..
Ja und ich ha da sogar na en wunderschöni Gitarre gfunde, wo halt na gstimmt werde mues... ich gang dä ide nächste Täg mal is Zentrum ga frage obs mer si ime Gitarregschäft stimme chönd, denn isch recht verstimmt und wür mi mega freue wenni da chli spiele chönt:) au hani es Büechergschäft gfunde, wo zwei, drü Büecher uf Dütsch hät. Eis vo dene gfallt mer, das heisst "Die Philosophie der Freiheit":) mal luege, viellicht gfindi ja na anderi:) Aber wie gseit staht jede Namitag amig was ah... und da ich ersch am 3 dihei bi und dä na ässe tuen, isch de Namitag zimli kurz und es längt nu für öpis z'erledige... Hüt z. B. hani kurzfristig na müesse da uf d'Migration ga zum na alles regle wegem Visum.
Ide Schuel bin ich ja in Marketing und das gfallt mir eiegentli ned soo... Drum han ich ez gfraget, ob ich chönt eigeti Arbete mache wie z. B. es Buech uf Spanisch lese oder en Arbet über d'Gschicht vo Ecuador oder Incas oder so schriebe. Ich hoffe es funktioniert, wür mi nämli mega freue was anders chöne mache:) Denn isch scho chli nervig wenn mer ime andere Land isch, wo so wunderschöni Landschafte hät und so idrücklichi Kultur und mer mues eifach jede Tag mit em Büsli id Schuel^^
Ah ja übrigens chamer da scho Züg für Wiehnachte kaufe!!!!^^ hehe die Brichterstattig isch ez chli vieles uf s'mal und chli alles durenand^^ aber mängmal weisi gar ned so was schriebe, wil ständig öpis chlises mir id Auge sticht und ich denke, wow das muesi schriebe, aber bis ich denn mal dezuechume dä isches wieder us mim Köpfli verschwunde... und eifach verzelle was mer de lieb langi Tag ide Schuel machid isch au ned bsunders intressant^^ Ja wünsch euch ämel na en schöni Zit und schriebid mer mal was so ide Schwiz lauft^^:)

Wuchenändi

Phuu das Weekend isch volls Programm gsi, aber isch tip top gsi:) Ich ha chöne arrangiere, dass ich de Samschtig für mich gha ha. Am morge bini chli an PC zum Brichtli schriebe und im Skype kommuniziere. Nacher bini allei is Zentrum zum na paar Sache kaufe. Dä hät mir de Esteban gschriebe, ob ich am Abig was mit ihm und de Kollege mache wil. Eigentli hät mini Family dän welle mit mir Cuy ässe, aber ich ha dä gseit, dass ich heigieng zum frage und ihm dän tüg antworte. Hehe jaaa und dä han ich im Zentrum öper gfraget, ob d'Linie 20 da au durefahri und zwar in Richtig Hurtado de Mendoza (a dere Strass wohn ich^^). Dä hät de Typ gseit ja dä fahri da dure. Dä bini in Bus igstiege und fahre so dur s'Zentrum und nacher so a Ort dure, woni voll ned kennt ha^^ Aber ich ha denkt, naja ich kenn mich ja ide Stadt nani soo us, viellicht fahrt dä ja chli neumet andersch dure weder s'5i woni letscht mal gna ha. Plötzli häts immer weniger Hüser und so fasch nume na Blechhütte und mega viel Natur...:P hehe und dä hani langsam denkt, nei dasch glaub doch falsch:P dä hani die wo vor mir gsässe sind im Bus gfraget, ob dä Bus richtig Hurtado de Mendoza fahrt und si händ gseit, nei da sig i di ander Richtig^^ hehe guet dä bini usgstiege und is 20i igstiege wo entgäge cho isch^^ bi dä ersch irgendwie 2 Stund später dihei gsi alt planet, aber defür hani chli vo de Stadt und Umgebig gseh^^ Und ded muesi unbedingt mal wider dure und zwar mit de Cam, denn ded hät mer en herrlichi Ussicht über de ganzi unteri Teil vo de Stadt mit de mächtige Chile und so:) Ja und dä bini dihei acho und dä händs gfunde, ich sell ez Cuy probiere... Ich ha denkt, da häsch eifach so es chlises Stück Fleisch im Teller, aber dasch s'halbe Meerschweinli gsi, mit Fuess und Schwanz und so!!! Wäh mir isches schier überecho...:P Dä hanis so agluegt und es Stückli probiert und ich has dä au würkli ned gern gha und dä hani gseit ja ich heigs ned so gern, ich täg lieber s'andere esse...^^ Ja und dä hani döfe usegah am Abig. Mir händ uns wider im Mile troffe, wo sich immer all Jugendliche treffid. Dä simmer ine Bar chli eis ga trinke und dä simer chli umegloffe und händ na anderi Lüts atroffe womer kennid. Nacher simer wider chli ide Stadt umegloffe und dä häts eifach zmitzt uf de Strass es Metal-Konzi gha^^ Und jede zweit isch mit me Jim Morrison Libli umegloffe und wo ich am Chumal gseit ha, dass ide Schwiz voll ned so viel Lüt die Band kennt, sind ihm fasch d'Auge zum Kopf usgfalle^^ Ja später simer dä zum Hus vom Chumal und dä hät er so gseit, ja da usse sig grad e Band am spiele und das wird ufgnah für irgend en Film. Hehe dä simer ded na ga zuelose:D Jaa und öpis a däm Abe isch liecht negativ gsi, nämli dass sich de Esteban i mich verliebt hät:P Sini Kollege händ ständig Sprüch gmacht, aber ich has ned würkli ernst gna.. Aber nacher simer so Arm in Arm umegloffe und nacher seit er so, dass er mich liebt^^ und so gäg s'Ändi vom Abe, womer dere Band zueglost händ, hät er mer eifach es Küssli uf Bagge gä^^ Dumerwies isch er i minere Klass - nimmt mi wunder wie das morn wird^^ ja uf all Fäll bin ich dä nacher mit em Taxi hei und ga penne. Hüt simer am morge uf Gualaceo gfahre. Dasch es Städtli wo 35 km entfernt isch vo Cuenca und meeega viel Touriste higönd. Ich ha sogar Schwizer atroffe ded^^ Ja und ded häts ide Mitti so en riesige Markt. Ded tüends kulinarischi Köstlichkeite vo Ecuador herstelle und verkaufe. Und dasch dä au grad de ersti Ort gsi womer hi sind^^ Am Igang hämer dä Tortillas kauft. Es git soo verschiedni Arte und si händ gfunde ich müess da vo allne chli probiere^^ nacher simer d'Stäge deruf und ded sind so rundume Tisch und Stüehl gsi und ide Mitti hät mer uf de ersti Stock abegseh. Wäh und mir häts schier eis gä... Ded obe im 2. Stock händs ganzi Säu uf some Bratteil gha und händ s'Fleisch abgschnitte und verkauft. Und wämer id Mitti abegluegt hät, isch überall Fleisch ufghänkt gsi!!! Mir isch echt fasch schlecht worde, da ich ja Bluet sowiso ned cha gseh und Fleisch ned so gern ha... de Vater hät mer dä welle Schweinshut abiete, das sig s'Bescht wos git. Aber da bini dä echt ned bereit gsi z'probiere^^ nacher simer wieder abe und dä hät mini Gastmum so en komische heisse Trank kauft. Mir hät si dä netterwies en Kokosnussdrink mit Glace kauft, dä isch dä au würkli fein gsii:) Dä simer witer mit eusem Türli und sind uf de andere Site vo dem Gebäude use. Und ded häts mi echt schier kippt... Ded händs di ghütete Meerschweinli uf so Bratstange ufgspiesst..!! Nacher simer entli fertig gsi mit dem grosse Markt^^ aso isch natürli mega faszinierend gsi, aber all die tote Tier hätti ned müesse gseh... denn simer na chli ide Stadt selber umegloffe und händ d'Ständ agluegt wo so artisanali Sache verchaufid:) Dä simer a sonen Fluss abe und sind ded chli ga spaziere. Ded häts dä so öpis gha wo ide Mitti so wie en Mühli isch. Dä häts en Holzstange vo dere Mühli us gäg usse und ded ziehnd zwei Stier dra. I die Mühli werdid dä Zuckerrohr inedruckt. Die werdid dä vollkomme uspresst vo dere Mühli und dä chunt vore so Zuckersaft use. Und dä trinkt mer dä eifach so. Aso für min Gschmack zimli z'süess...^^ Nacher simer witer uf Chordeleg, dasch so es Kaff wo Gold und Silber verkauft wird. Und natürli en Tonne Schmuck. Dä hämer uns uf de Heiweg gmacht und händ bime Dütsche Kafi halt gmacht, zum z'Mittag ässe. Nacher simer zu de Eltere vo mim Gastvater, dasch nämli jede Sunntig so. Ded sind dä au di andere Familiemitglieder gsi und dä hämer Empanadas gmacht und gässe und en heissi Schoggi trunke (aso ich find das passt ned so zäme, wil dasch halt salzig und süess, aber die nämid sogar en Biss Empanada und dä grad im gliche Zug en schluck heissi Schoggi^^). Ja und wos dä langsam dunkel worde isch simer äntli hei und ez setti na en Tonne Ufzgi mache für morn^^ Aber isch ämel voll s'coole Weekend gsi:) Hoffe euch gahts allne tip top ide Schwiz:)

Fritig Abig

De geschtrig Tag isch voll gechillt gsi ide Schuel:) Ei Lehreri isch ned da gsi und dä sind grad 2 Stunde usgfalle:) und da so herrlichs Wetter gsi isch, simer chli use ga tschutte und schnure:) nacher händs na welle "Tat oder Wahrheit" spiele, aber nu mit Wahrheit^^ ja und übrigens han ich das Spiel eigentli ned so gern:) nacher isch so voll peinlich gsi, dä hät mich eini gfragt welle Typ vo unsere Klass ich am hübschiste find. Und mir händ nu eine wo so richtig dunkel isch und grüeni Auge hät^^ dasch ebe de Delgado^^ und dä han ich so gseit er. Und nach de Schuel hät er so chli mit mir gred und gfragt was ich am Namitag oder Abe mach und dä han ich gseit, dass mir ebe vorheiget cuy z'ässe. Und er hät gseit ja er gäch wahrschinli chli use, öp er chöng mini Natelnummere ha, damit er mer sunsch chönt schriebe, falls ich doch au chönt cho. Dä bini hei und ha denkt dä schribt eh ned oder huere spat. Und am 4i hät er scho gschriebe und dä simer is mile, dasch so es riesigs Ikaufszentrum wo sich am Weekend d'Jugend chli trifft. Dä simer ga Alk poschte (Cuenca isch ned ume sunscht a 3ter Stell vo de Städt wo am meischte gsoffe wird...). De Delgado (aso mit Vorname eigentnli Esteban^^) hät mir dä all sini Kollege vorgstellt:) Sind voll zwägi Type - gfallet mer viel besser weder die Nataly. Si kennid all the doors :o und losid sunsch so reggae ah ja und janis joplin kennids au!!:) dä hani chli mit dene gred und isch voll gechillt gsi und nacher simer na zunere Party. Die händ da praktisch jedes Weekend Party bi öperem diheime, au wenn d'Eltere und Grosseltere da sind:P Ded isch ämel dä so voll easy Musig gloffe und all sind chli am tanze gsi, ah ja übrigens tanzt da immer en Typ und e Chica, niemert allei:) hehe und einisch sind so plötzli zwei alti Ömis dur d'Stube gloffe und in obere Stock ufe^^ ja dä Fründeskreis hät mir ämel scho tuusig mal besser gfalle:) und für hüt händs gseit, wellids mer dä später na chli s'Zentrum zeige. Ich hoff ich daf use.. wil da isch d'Familie ebe scho uh wichtig. Und öpis z'tue gits au immer. Denn mini Gastmum hät en richtige Suberkeitswahn!!!! S'Zimmer mues immer perfekt ufgrumt si. Ned mal s'Etui oder s'Schuelzüg daf ufem Pult ligge, au das mues ine Schublade igrumt werde. S'Bett mues mer immer alli Schichte abzieh und usschüttle und wider drufmache und am Schluss so en grossi wiessi Decki wos amig ide Hotels hät, damit kei Staub drufchunt. Für mich chli übertriebe, so han ich s'Gfühl, dass s'Zimmer mega unbelebt isch... ja und Unterhose und Socke tuet mer da vo Hand wäsche. D'Hose und de Rescht tuet mer au zersch vo Hand wäsche und denn id Wäschmaschine... Ah ja und jede Tag wenn ich vo de Schuel heichume, mues ich mis Liebli vo de Schuel wäsche!!! Und si möcht, dass ich jede Tag d'Kleider wechsle (wie wenn ich so viel Kleider hät...) aber ja ich hoff das wird ned zume Problem, denn da sind mir ganz anderscht!!:)

Wucherückblick

Ja die Wuche hani ned so de Zit gha zum was schriebe, da ständig was los gsi isch. Mer chönd meine, ich sig da scho so voll im Alltag drin, aber na isch jede Tag andersch... S'isch zwar jede Morge Schuel, aber au ded gits Abwechslig. Denn ich verstah immer meh und cha drum ide Stund au chli was schaffe und die vo de Klass sind mega nett und reded di ganz Zit mit mir:) Au chömid ufem Pauseplatz plötzlich irgendwelchi Lüt und fraget ob mer dä oder die kennt und fanget chli ah schnure:) Da ich jede Morge und Mittag en Stund im Schuelbus verbringe, han ich au chli Zit zum mine Gedankenahhange. Und au gseht mer immer intressanti Sache. So z. B. häts jede Mittag wenn ich vo de Schuel heigang mit em Bus bim Fluss Iheimischi wo ihri Kleider ded wäschid:) Am Namittag simer dä amig is Zentrum wils immer wider was für d'Schuel z'poschte gä hät. Dä isch gli mal dunkel worde und mer isch hei ga ässe und na chli Ufzgi gmacht und dä ga schlafe:) Momentan isch grad mega cool, wil ich d'Lüt won ich bis ez sympathisch gfunde ha na chli besser kennelerne:) Die sind au all uh nett und fraget eim ständig ob mer was mit ihne macht...:) Hüt Abig gangi mit eim vo minere Klass use wo mega nett isch:) Ja und de morndrig Tag han ich für mich reserviert:) Dä gangi chli is Zentrum na ga paar Sache poschte und am Abig gömer dä is Hallebad:) Ah ja und hüt Abig gits cuy (dasch Meerschweinli) zum z'Nacht... Zum Glück han ich am Afang gseit, dass ich ned so viel Fleisch isse. Si händ eifach gseit ich sell probiere und wenis ned gern han, dä isch au easy.
Hüt am Morge isch hellblaue Himmel gsi und über de Berge häts Dunst gha - das isch de schönst Morge wo ich da jeh gseh han:) Aber wenn d'Sunne schiint, dä schiint si mega fescht!!
Ich versuech, immer am Samstig morge, dass heisst bi euch am Namitag, im msn z'si und dän au Bricht z'schriebe. Denn unter de Wuche wirdi nüm allzu oft dezue cho wil immer so viel los isch und ich dä am Abig toodmüed bi:)

Föteli vom Geburi

Ja a mim Geburi simer ja ebe i sone disco. Dä ganz links hämer ded kenneglernt, dä näbedra isch en Kolleg vo de Nataly, dän ich, und dän d'Schwö vo de Nataly, d'Marie-August

Da sind nomal fasch alli wo mit id disco cho sind. Die links vo mir isch d'Nataly.

Ja dasch dä s'grosse Fescht diheime gsi. So mit natürli en Tonne z'ässe:P vo links: Anne-Christine, Marcelita (mini Gastschwö), d'Linn (Ustuschschüeleri vo Dütschland), ich und min Gastdad

De Bluemestruss wo min Gastdad mir gschenkt hät, ha mega freut gha:) Ja hehe und ich ha das Föteli au na usgwählt, da mer im Hintergrund echli vo de bonzemässigkeit gseht. So z. B. rechts en Teil vo de Husbar und links Sofas und alles passt immer perfekt zäme:P

Geburi:)

Ja geschter bini nachem Zmittag mit enere Schuelkollegin chli is Zentrum und ded hämer dä na anderi Kollege vo ihre atroffe und sind eis ga zieh. Hehe und nacher fragt si mich so ob ich pipa kenne. Das sig so zum Rauche. Dä hani gseit, ich täg ned rauche, nume Shisha. Und si hät dä ned gwüsst, was das isch. Nach erkläre mit viel Geste simer dä drufcho, dass mer s’gliche meinid^^ Das heisst, die kännid da au Shisha^^ Ja und nacher simer dä mal wider hei. Am Abig isch dä d’Nichte vom Gustavo,d’Nataly, cho zum mich abhole, zum id Disco ga. Und ja ich ha si eigentli ned so gern, denn si verzellt immer vo party mache und suufe und so… Ja und si hät gseit ich sell mich dä schminke und so alege für de Usgang. Ja dä han ich mich parat gmacht, ha eifach chli Wimperetuschi druftah und helle Lidschatte. Und ja ich bi halt eifach mit mine converseähnliche Schueh gange und normale jeans. Dä isch si mich ga abhole und dä simer na es paar anderi ga abhole und schlussendli simer zu ihre hei. Dä hät si gfunde ich mües mich na schminke^^ und ich so denkt, ähm ja hani eigentli scho, aber egal^^ Nacher hät e Kollegin vo ihre mich gschminkt – ich bi na nie sooo heftig gschminkt usem Hus!!! Aber das isch ned gnueg gsi, si hät mer grad na en hutängi jeans verpasst, wo knapp über de Arsch reicht und na heftigi Stögelischueh!!! Ich bi mir vorcho, wie wenn ich weiss ned a was für en wichtige Alass wär!! Nacher simer dä mit em Taxi id Disco gfahre. Ded simmer dä voll ga abtanze:) Ich bi mer mit mine Kleider chli blöd vorcho wils ned ich bi, aber ja, kennt mi ja niemert^^ D’Disco isch recht geil gsi und ade Wand häts – ez chunts… - es riesigs Jim Morrison Bild gha!!!!:D:D Mini Gastmum hät de Nataly gseit, si mües mega uf mich ufpasse und ich döfi nüt trinke und ned rauche und so!! Und das hät si andersch ernst gna (aso mit em trinke ned, si hät mir di ganz Zit was abote, aber ja ich ha kei Luscht gha…). Immer wenn iregend en Typ cho isch und gfragt hät, ob er mit mir tanze darf, hät si gseit nei! Und zu mir dä amig so, dä isch viel d’hässlich, du chasch ussueche!! (das hani langsam satt!:P vor allem han ich ned so de glich Gschmack wi si, ich mag halt ned so mega ufgstylti und gschlecketi Type^^) Ja und nacher simer dä mal wider richtig hei, nämli zunere Kollegin vo ihre und die hät mich dä heigfahre.

Schuel bis ez

Ich bin ez da en Wuche id Schuel:) D’Lüt vo de Klass sind mega nett und hilfsbereit. Denn ich verstah ned alles, was d’Lehrer sägid, denn sie redid mega schnell^^ Am Abig bin ich immer todmüed, vor luter Asträngig bim Zuelose^^ De Schuelbus chunt mich jede Tag am viertel vor 7ni ga abhole. Dän fahr ich en Stund ide Stadt ume, will ich di erst bi wo istiegt und de Bus jede Schüeler vorem Hus abholt. Denn müend all Meitli vom primero curso und all Buebe vom primero curso bis zu eus im sexto curso i ei Reihe stah. Denn seit de Rektor es paar Wort und nacher müemer in Reih und Glied d’Stäge zu unserem Schuelzimmer ufelaufe. Mir sind immer im gliche Schuelzimmer, d’Lehrer tüend da Zimmer wechsle. Nu für s’Englisch müemer ines anders Zimmer, will da isch mer ned ide gliche Klass wie sunsch, denn da gahts nach Niveau. Aso ebe, sobald mer ufegloffe sind und is Zimmer sind, fangt di erst Lektion ah. Ei Lektion duuret mit Lehrerwechsel 40 Minute (aso wahrschinli öpe 35 Minute Schuelzit). Und da d’Lektione so churz sind, hämer recht viel Lektione a eim Morge und es wird au umso meh Stoff inedruckt,.. Nach es paar Lektione isch e halb Stund Pause. Denn sind namal paar Lektione und dä isch 20 Minute Pause. Nacher isch nomal e Lektion und dä na Sport. Aber ja, aso Sport chamers ned würkli nenne… Denn di meischt Zit isch de Lehrer gar ned da und mir hängeds eifach, oder wenn er chunt dä tüemer eifach chli quatsche… Und am Mäntig hämer kei Sport, denn das isch de Tag, wo d’Fraue mit churze Röckli und schwarze Schueh id Schuel müend und d’Männer mit meh oder weniger me Azug. Am Zischtig und Dunschtig isch dä di wissi Uniform agseit, dasch eifach so wie en Trainer. Und am Mittwuch und Fritig müemer s’Jäggli vom dunkle Trainer mit Jeans alege und dezue wissi Turnschueh:P Aso isch recht strikt, und wenn mer sich ned drahaltet, dä bechunt mer en Minuspunkt und nach weiss ned wie vielne flügt mer… Ah ja und wenn mer fehlt, dä mues mer em Rektor alüte und innert de nächste 48 Stund mues de Vater ga unterschriebe, sunsch gits au wider es paar Minuspünkt.

1. Schueltag^^

Hüt bin ich s'erst mal da i d'Schuel:) Nach me chli turbulente Morge, wil mini Uniform vertuscht worde isch und ich na im Züg ha müesse umesekle, han ich mit em Taxi i d'Schuel müesse. Ich bi dä grad zu dere Zit cho, wo Englisch agstande isch. Und da all Ustuschschüeler besser Englisch reded weder d'Ecuadorianer, sind mir glaubs öpe 6 Ustuschschüeler zäme inere Englischklass und dä na es paar Ecuadorianer. Es hät zwei wo riiiesigi Witzbolde sind...! Die sind stääändig am rede und lönd riese Scheiss use!! De eint (de Fabian) hät scho agfange Briefli schriebe mit mir... und immer wenn d'Lehrerin ihn zäme gschisse hät, wil er mal wider voll am Schnure gsi isch, dä hät er gseit, but I love youu!! Do you wan't to be my friend? hehe sind na luschtigi Gselle^^ Si sind scho ide erste Stund versetzt worde^^ Unseri normali Klass (ich bi im 6. curso marketing, dasch s'letschte Jahr da) isch au voll easy. Hehe eine isch andersch hübsch und heisst Delgado zum Nachname!! Hehe ha grad müesse lache wo er de Name gnennt hät^^ Aber was chli scheisse isch, isch dass mis colegio zimli wit vo mim Hus entfernt isch. Ich mues öpe en Stund im Schuelbus sitze, bis fasch all dihei acho sind... Da fahrt ebe so en Schuelbus und dä bringt d'Schüeler bis vor s'Hus hi hei. Aber ja dadefür mues er ide ganze Stadt umefahre. Am morge mues ich am viertel vor 7ni vor de Tür si und am Mittag chum ich fängs am 3 hei... Aber defür häts ded en mega schöni Umgebig und wie gseit, Klass isch glaub recht easy. Woah und hüt hämer na d'Lischte becho, was mer alles chaufe müend... Phuu nacher simer ga ichaufe und ich bi mit me andersch volle Sack zrugcho!! Da isch ebe gnau vorgä was für Heft mer chaufe mues... Z. B. es grosses A4 Heft mit 200 Blätter und ghüslet, denn 4 grossi A4 Hefter mit 100 Blätter und ghüslet. Aso würkli üsserst gnau... Aber ich finds easy, dass ez chli meh los isch:) Ich bi mer au na grad en Stadtplan ga chaufe, demit si mich dä au mal chli öfter allei uselönd:)
Mir isch na im Nachhinein was zu Guyaquil igfalle^^ wo mer ded so sind ga spaziere, isch es chlises Chind zu mir cho und hät mich mit riesige Auge agluegt und hät mich sogar welle alange, weg de Hut^^ Hehe ich has recht amüsant gfunde^^